Календар, житија, пости
 

 

Православен календар за 03/09/2024

Календар, житија, пости
Почеток
 
 

Светиот апостол Тадеј

Еден од Седумдесеттемина, а не оној Тадеј којшто беше од Дванаесеттемина апостоли. Свети Тадеј прво го виде и го слушна Св. Јован Крстител и прими крштевање од него, а потоа Го виде Господ Исус и Го следеше Него. Господ го вброја меѓу Седумдесеттемина помали апостоли, коишто ги испрати двајца по двајца пред лицето Свое (Лука 10, 1). После Своето славно Воскресение и Вознесение Господ го испрати Тадеј во Едеса, која е родното место на Тадеј, според ветувањето што му го даде на кнезот Авгар кога му ја испрати крпата со Својот лик на неа (откако се избриша). Штом ја целиваше таа крпа Авгар се излечи од лепрата, но не сосем. Малку лепра му остана на лицето. Кога Св. Тадеј му се јави на Авгар, овој го прими со голема радост. Апостолот го поучи во верата и го крсти. Кога излегуваше од водата на Крштението, остатокот од лепрата на неговото лице спадна и тој стана сосем здрав. Кнезот Авгар Го прослави Бога и посака и неговиот народ да Го познае вистинскиот Бог и да Го прослави. И кнезот ги повика сите граѓани на Едеса пред апостолот Тадеј за да ја чујат проповедта за Христа. Откако ги чуја зборовите на апостолот и го видоа кнезот чудесно исцелен, луѓето ги отфрлија идолите и нечистото живење и ја примија Христовата вера и се крстија. Кнезот Авгар изнесе многу злато и му го понуди на апостолот, но Тадеј му рече: „Кога своето го оставивме, како да го примаме туѓото?“ И тој го проповедаше Евангелието ширум Сирија и Феникија. Се упокои во Господ во градот Вирит Финикиски.

Тропар
Мирот Господов на дар ти подари, о Тадее, Христов апостоле, каде што во Име Божјо приман беше, чудеса и исцеленија по вера се умножуваа, кнезови и старешини пред нозе Христови припаѓаа во Црквата Негова. Моли се, апостоле, мирот при нас да остане, по твоите свети молитви, по твоите за Христа подвизи.

Светата маченичка Васа и нејзините деца: Теогниј, Агапиј и Пист

Беше жена на идолски жрец, но потајна христијанка. Своите синови ги воспита во христијански дух. Нејзниот маж ја замрази заради христијанската вера и ја предаде на мачење нејзе и синовите. После тешки измачувања ги убија нејзините синови со меч (се мисли дека ова било во Едеса, во Македонија). Васса беше радосна заради чесниот крај на маченичкиот подвиг на нејзините синови и оттогаш самата со уште поголема усрдност минуваше од мака во мака. Кога ја фрлија во морето, се јавија ангели и ја одведоа на еден остров во Мермерното Море, каде што беше убиена со меч, во времето на Максимијан. Света Васса двојно се удостои со Христовото царство: како маченичка и како мајка на маченици.

Тропар
Големината на верата твоја во Господа нема да се измери со венецот маченички, о Васо света маченичке, туку со благодатта која ги затвори трите рани на срцето и ја закрепна душата која породи три ѕвезди Христови: Теогниј, Агапиј и Пист. Ангелите кои покрај тебе стражареа до крајот на земното страдање ја понесоа молитвата твоја до Бога за сите оние кои го чествуваат вашиот свет спомен.

Преподобен Аврамиј Смоленски

Роден е во градот Смоленск, по молитвите на своите родители. Рано стапи во монаштво и се предаде на голем подвиг подражавајќи ги древните пустински отци. Подоцна го основа манастирот на Чесниот Крст кај Смоленск. Претрпе многу искушенија од демоните и од луѓето, со големо трпение и благодарност кон Бога. Еднаш во време на голема суша со молитва низведе дожд. Откако помина педесет години во монашки чин, се упокои мирно во Господ околу 1220 година.

Тропар
Очите на умот отворајќи ти ги од младоста твоја, о Аврамие, оче преподобен, Господ те испрати на солзниот пат, да вкусиш од телесното мудрување на човекот, но да останеш во вистината и благодатта Негова. На многумина помош стигна Спасителева преку тебе, оче свет, и духовна наука процветува по твоите молитви, на кои и ние денес се надеваме, тебе те чествуваме и Христа Го прославуваме.

Светите праотци Авраам, Исаак и Јаков

Се споменуваат и во неделата на праотците пред Божик, како праведници и Божји угодници.

Тропар
О верни слуги Господови Аврааме, Исаку и Јакове, праотци Господови по тело, во чии пазуви се утешуваат угнетените, на чие смирение се поучуваат подвижнициите, со вашата ревност се послужуваат исповедниците, од благодатта ви дадена се напојуваат мачениците. Радувајте се, многудетни патријарси кои Бога Го прославивте, и молете се за нас да н? дочекате во дворите на вечноста.