Животодавче, отвори ми ја вратата на покајанието!
 
 
 
 
 

Животодавче, отвори ми ја вратата на покајанието! (16.03.2013)

Покајанието е изразено во грчкиот збор μετάνοια (метанија). Во буквална смисла, тој означува промена на умот (преумување). Со други зборови, покајанието е промена на човечкото расположение, навиките, начинот на размислување; промена на нешто внатрешно. Покајанието е нова анализа на човечките погледи, промена на животот.

Како може да дојде до ова? На истиот начин на кој темната соба е осветлена од зраците на сонцето кога човекот ќе влезе во неа. Гледајќи во собата која е во мрак, тој може да види некои работи а поголемиот дел од работите не може да ги види, но не се сомнева во нивното присуство. Многу работи се гледаат различно од тоа какви што навистина се. Човекот мора да се движи внимателно бидејќи не знае на какви препреки може да наиде. Меѓутоа, кога собата ќе се осветли, работите се гледаат појасно и движењето е послободно.

Истото се случува и во духовниот живот.

Кога сме потопени во гревови и нашиот ум е преокупиран со световни грижи, ние не ја приметуваме состојбата на нашата душа. Ние сме рамнодушни кон она какви сме внатрешно и долго остануваме на лажниот пат, без да сме свесни за тоа.

Но кога зракот на Божјата Светлина ќе навлезе во нашата душа, каква нечистотија гледаме во нас! Колку многу лаги, колку многу невистини! Колку многу гнасни дела се откриваат, а за кои сме мислеле дека се привидни! И ни станува јасно кој е вистинскиот пат.

Ако тогаш ја препознаеме нашата духовна ништожност, нашата грешност и најсериозно сакаме наше поправање, блиску сме до спасението. Од длабочината на нашата душа ние со солзи ќе Го молиме Бога: „Смилувај се на мене Господи, смилувај се заради Твојата голема милост! Прости ми и спаси ме! Дај ми да ги видам сопствените гревови и да не ги осудувам моите браќа!“

Со почетокот на Великиот пост да побрзаме и да си ги простиме, едни на други, сите навреди и злоби. Секогаш да ги слушаме зборовите од Евангелито за неделата на простувањето: „Бидејќи ако им ги простите на луѓето нивните гревови и вам ќе ви ги прости вашиот Отец небесен. Ако, пак, не им ги простите гревовите на луѓето и вашиот Отец нема да ви ги прости вашите“ (Мат. 6, 14-15).

 

Св. Јован Шангајски и Сан-Франциски